Pashto :: Pashtuns :: Pashtunkhwa :: Pashtunwali
پښتو :: پښتانه :: پښتونخواه :: پښتونوالی

غزل

عبدالهادي حيران

دا چې زړونو کښې تورتم دے
دا د ټولو نه لوئي غم دے!!

کۀ جذبه د لېونتوب وي
نو منزل ته يؤ قدم دے

حال د ژوند بس دومره ډېر دے
چې حالاتو سره سم دے

علامت د بربادۍ دے
مونږ تراشلے چې صنم دے

(ق)

يؤ سړے چې هيڅ يې نۀ زده
استاد هم دے، لارښود هم دے

دا لا کوم وحشت راخور دے
د هر چا سترګو کښې نم دے؟

(ق)

د ښار ډېرې دروازې دي
اؤ په هره يوه کښې غم دے!

دا تاريخ ورانول ګران دي
دا په زړونو کښې رقم دے

د ژوند ډېرې تقاضې دي
د انسان عُمر ډېر کم دے