Alta Hum Wrak Dalta Hum Wrak

پښتو :: پښتانه :: پښتونخواه :: پښتونوالی

دلته هم ورک يم، هلته هم ورک يم!, عبدالهادي حيران
د خېبر وېب پاڼې باندې په2 جنوري 2006 خپره شوې ده (http://www.khyber.org)



دلته هم ورک يم، هلته هم ورک يم!

عبدالهادي حيران

حال دا دے

خپرؤنو نېټه: 2 جنوري 2006

څو ورځې د مخه مې د افغانستان د کندوز ولايت نه يؤ د ماما زوي، چې دوه مياشتې وړاندې يې له پېښور څخه کندوز ته کډه بار کړې وه، راغے اؤ يوه ډېره عجيبه خبره ئې وکړه.

هغه ووئيل " په کندوز کښې خلق مونږ ته مهاجر وائي ".

وروسته راته معلومه شوه چې د افغانستان په ځينيو نورو ولايتونو کښې هم هغه افغانان چې د جهاد پر مهال پاکستان ته رامهاجري شوي وو اؤ اوس بېرته خپل هېواد ته تللي دي، خلق ئې د مهاجر په نوم بلي.

د ماما زوي مې راته ووئيل:

" په کندوز کښې د کرايې په يؤ دوکان پسې ګرځېدم چې د چانه به مې پوښتنه وکړه نو هغۀ به د پاکستان څخه ستنو شويو افغانانو ته کنځلې شروع کړې اؤ وئيل به ئې {پاکستان نه د دې مهاجرو د راتلو سره هر څۀ ګران شوي دي.... قيامت ئې جوړ کړے دے.}".

دې سره زما سترګو ته هغه ورځې نېغې ودرېدې چې د پېښور په کوڅو کښې د کرايې په يؤ کور پسې ګرځېدم اؤ چې د چا نه به مې پوښتنه وکړه نو وبه ئې وئيل " د دې مهاجرو داسې داسې وکړم............. هر څۀ ئې ګران کړي دي.....چې د کرايې کور خالي شوے نۀ وي دوئ نيولے وي........".

ډېرو افغانانو به په پاکستان کښې داسې خبرې اورېدلي وي. زمونږ يؤ محترم اؤ مشر ملګرے خو چې داسې خبرې واوري نو سمدستي د امريکې پخواني صدر ريګن ته بد رَد وئيل شروع کړي ځکه چې ريګن به هر وخت دا خبره کوله چې " افغانانو د پاکستان اؤ د امريکا حفاظت کړے دے". خو اوس دا حال دے چې د دغو افغانانو حيثيت د امريکا په نظر کښې د ترهه ګرو دے، پاکستان کښې خو مهاجر دي چې په افغانستان کښې هم د مهاجر نوم ورپورې څلېښ دے.

دا حال صرف د هغو افغانانو دے چې په يوه سپېڅلے جذبه ئې د جهاد اؤ هجرت لپاره قدمونه پورته کړي وو اؤ تر اخره پورې په همدې حال کښې پاتې شول. کومو خلقو کښې چې په دې دواړو نعرو کاروبار کړے ؤ اؤ کوي ئې هغوئ خو په هر حال اؤ هر بدلون کښې د خپل کاروبار لپاره لارې چارې پيدا کوي اؤ خپل کار وباسي. غم صرف د هغو خلقو دے چې جهاد ئې هم وکړو، مهاجر هم شول، خوار و زار اؤ در په در هم شول اؤ اوس چې پاکستان نور د دوئ "بوج" نۀ شي برداشت کولے نو په خپل هېواد کښې هم ځاى نلري. څوک د کونړ په غرونو کښې د ژمي په دې يخو شپو کښې د بې وسۍ په کُومي کښې ژوند کوي اؤ څوک د ننګرهار د حصار شاهي په دشتو کښې په خېمو کښې پراتۀ دي. اؤ څوک چې په کندوز کښې خپلې زمکې اؤ کورونه لري نو هغوئ هم "مهاجر" دي. ايا د مهاجرۍ دا ټکے به دې افغانانو سره لکه د خپل سيوري هر وخت اؤ په هر ځا‌ى کښې ملګرے وي؟؟؟.

په پاکستان کښې پاتې اؤ تر اوسه پورې مېشته افغانانو ته په دې ټکي غور اؤ سوچ پکار دے. کۀ حالات هم په دې ډګر روان وي لکه چې دا اوس دي نو هغه ورځ هم راتلونکې ده چې پاکستان خو هسې هم دا افغانان دلته نۀ پرېږدي، افغانستان به هم ترېنه انکاري شي. خداى (ج) دې نۀ کړي چې داسې وخت راشي خو د حالاتو دا نښې نښانې همداسې وائي چې د "مهاجر" دا ټکے به مونږ دلته هم ورک کړي اؤ هلته هم ورک!!!. يعنې نۀ د دين اؤ نۀ د سادين.

د جدي په تېره شپږمه لکه د هر کله پشان په افغانستان کښې اؤ له افغانستانه د باندې د جدي شپږمه وغندل شوه چې په دغه ورځ شوروي فوځونه افغانستان ته راغلي وو اؤ د ثور په اتمه به هم لکه د هر کله پشان خوشحاليانې وشي چې په دغه ورځ د کابل حکومت د مجاهدينو په لاس ورغلى و. په دې ټول دور کښې افغان مهاجر ته په لاس څۀ ورغلل؟ بس دا چې د تل لپاره "مهاجر" شو!!؟

Image Credit: Afgha.COM

Comments

Comments powered by Disqus

دلته هم ورک يم، هلته هم ورک يم!, عبدالهادي حيران
د خېبر وېب پاڼې باندې په 2 جنوري 2006 خپره شوې ده (http://www.khyber.org)